دعوت اسلام :اللہ تعالی کے نزدیک اسلام ہی سچا دین ہے، اللہ عزوجل نے ہمارا نام مسلمان رکھا،یہی دین حضرت آدم علیہ السلام اپنے ساتھ دنیا میں لائے، اسی دین کی دعوت، حضرت نوح علیہ السلام پچاس کم ،ہزار سال تک دیتے رہے، اللہ جل شانہ کے خلیل حضرت ابراہیم علیہ السلام اسی دین کی نشرواشاعت کرتے رہے اور اپنے زمانے میں اپنے اول مسلمان ہونے کا کھل کر اعلان فرمایا ، حضرت اسمعیل علیہ السلام نے ، دین اسلام پھیلایا، حضرت یوسف علیہ السلام نے اپنے دور حکومت میں اسلامی نظام نافذ کیا، اور دعاکی ، اے رب! مجھے مسلمان اٹھا، حضرت موسی علیہ السلام، اسلام ہی کی دعوت دیتے رہے، حضرت داؤد علیہ السلام نے اسلامی خلافت قائم کی اور سب کو اسلام کی دعوت دی، حضرت سلیمان علیہ السلام نے عظیم الشان اسلامی حکومت قائم کی اور اس وقت کے سلاطین و عوام کو اسلام کی طرف بلاتےرہے، حضرت عیسی علیہ السلام نے بھی اسلام کا پیغام پھیلایا اور اپنے بعد نبی آخرالزماں ﷺ کے آنے کی خوش خبری سنائی ، خاتم النبیین ﷺ نے اسی دین کی اشاعت فرمائی، اللہ عزوجل نے، حجۃ الوداع کے موقع پہ، تاجدار ختم نبوت ﷺ کی زبان مبارک سے، اسی دین اسلام کی تکمیل کا اعلان کرایا ، اور فرمایا ، تمھارے لئے اسلام کو دین پسند کیا ،خلفائے راشدین ، صحابہ، تابعین، ائمہ، اولیا، غوث ، قطب، ابدال ، علما، صالحین، رضی اللہ تعالی عنہم اجمعین سب اسی دین اسلام کی نشر واشاعت کرتے رہے، اللہ تعالی کے سارےبندوں پرلازم ہے کہ اللہ کے دین پر ایمان لائیں، اسلام سے وابستہ رہیں، اللہ تعالی کے انعام یافتہ بندوں نے جو ہمیں سیدھی راہ دکھائی ہے،اسی پر ہم گام زن رہیں اور اللہ والو ں کا دامن مضبوطی سے تھام لیں۔اور سچوں کے ساتھ ہوجائیں ، یا اللہ! ہمیں اسلام پر استقامت عطافرما، اسلام کی دعوت عام کرنے اور اس پر عمل کرنے کی توفیق بخش دے، اصلاح امت کےعظیم مقصد میں کامیاب و کامراں فرما، ایمان واسلام کےساتھ خاتمہ نصیب فرما، نبی اکرم ﷺ کے شہر مدینہ منورہ میں موت دے، ان کےجوارمیں مدفن بنا اور انھیں کےغلاموں کے ساتھ ہمارا حشر فرما۔ آمین ، یا رب العلمین ،بجاہ حبیبہ سید المرسلین ،علیہ الصلوۃ والتسليم۔