دعائے نصف شعبان، دعائے شب براءت
بِسْمِ ﷲِ الرَّحْمٰنِ الرَّحِیْم

فضائل شب براءت

اِنَّآ اَنْزَلْنٰهُ فِیْ لَیْلَةٍ مُّبٰرَكَةٍ اِنَّا كُنَّا مُنْذِرِیْنَ(۲)فِیْهَا یُفْرَقُ كُلُّ اَمْرٍحَكِیْمٍۙ(۳)

بےشک ہم نے اسے برکت والی رات میں اتارا، بےشک ہم ڈر سنانے والے ہیں اس رات میں ہر حکمت والا کام بانٹ دیا جاتا ہے۔(قرآن کریم سورہ دخان آیت۲، ۳)
بعض مفسرین نے فرمایا، برکت والی رات سے مراد ، شب براءت ہے۔
اس رات سے اگلے سال کی رات کےدرمیان جوکچھ ہونے والا ہوتاہے، وہ سب لکھ دیاجاتاہے مثلاً بندوں کارزق، ان کی موت، اوردوسرے تمام کام۔ بعض مفسرین نے کہاپندرہویں شعبان کی رات میں لوح محفوظ سے کام شروع ہوکر، شبِ قدر کوختم کیاجاتاہے۔(تفسیر روح البیان،سورہ دخان)
شعبان کی پندرہویں رات کانام شب براءت  (لیلۃ البراءۃ)  ہے اس رات کی بڑی فضیلت ہے۔
نبی اکرم ﷺ نےارشادفرمایا:
فَیُغْفَرُ لِاَکْثَرَ عَدَدِ شَعْرِغَنَمِ بَنِیْ کَلْبٍ۔ (ابن ماجہ شریف)
(اس رات، قبیلہ )بنی کلب کی بکریوں کے بالوں کی تعداد سے زیادہ لوگوں کی بخشش ہوجاتی ہے۔
نبی کریم ﷺ نےارشاد فرمایا، اللہ تعالیٰ چار راتوں میں بھلائیوں کےدروازے کھول دیتاہے۔
(۱) عیدالاضحیٰ کی رات (۲) عیدالفطر کی رات (۳) شعبان کی پندرہویں رات(۴) عرفہ کی رات۔
(تفسیرصراط الجنان، بحوالۂ درمنثور، سورہ دخان)

شب براءت کے نوافل

(۱)نماز مغرب کےبعد ۶ رکعتیں اولیاءاللہ کےمشہور معمولات سے ہیں۔ اس میں ہر۲ رکعت پرسلام پھیریں اور ہر ۲ ر کعت کےبعد سورۂ یٰسٓ ایک مرتبہ یاسورۂ اخلاص ۲۱ بار پڑھیں۔پہلی بار سورۂ یٰس ٓ ، درازی ِعمر کے لیے پڑھیں، دوسری بار رزق کی ترقی کےلیے، تیسری بار دفعِ بلا کے لیے، پھر دعا ئے نصفِ شعبان پڑھیں۔

دعاےنصفِ شعبان

بِسْمِ ﷲِ الرَّحْمٰنِ الرَّحِیْمِ
اَللّٰهُمَّ یَا ذَا الْمَنِّ، وَلَا یُمَنُّ عَلَیْہ، یَا ذَا الْجَلَالِ وَالْإِکرَامِ، یَا ذَا الطَّوْلِ وَالْاِنْعَامِ، لَآ اِلٰهَ اِلَّآ اَنْتَ، ظَهْرُ الَّاجِیْنَ، وَجَارُ الْمُسْتَجِیْرِیْنَ، وَاَمَانُ الْخَائِفِیْنَ، اَللّٰهُمَّ، إِنْ کُنْتَ کَتَبْتَنِي عِنْدَکَ فِيٓ أُمِّ الْکِتَابِ شَقِیًّااَوْمَحْرُوْمًااَوْ مَطْرُوْداً اَوْ مُقَتَّرًا عَلَيَّ فی الرِّزْقِ، فَامْحُ، اَللّٰهُمَّ بِفَضْلِکَ شَقَاوَتِیْ وَحِرْمَانِیْ وَطَرْدِیْ وَاقْتِتَارَ رِزْقِیْ، وَاَثْبِتْنِیْ عِنْدَکَ فِیٓ اُمِّ الْکِتَابِ سَعِیْداً مَّرْزُوْقاً لِّلْخَیْرَاتِ، فَاِنَّکَ قُلْتَ وَقَوْلُکَ الْحَقُّ،فِیْ کتَابِکَ الْمُنْزَلِ، عَلیٰ لِسَانِ نَبِیِّکَ الْمُرْسَلِ،یَمْحُواللہُ مَایَشَآءُوَیُثْبِتُ وَعِنْدَهٗٓ اُمُّ الْکِتٰبِ. اِلٰھِیْ بِالتَّجَلِّی الْاَعْظَمِ، فِی لَیْلَۃِ النِّصْفِ مِنْ شَھْرِ شَعْبَانَ الْمُکَرَّمِ، اَلَّتِی یُفْرَقُ فِیْھَا کُلُّ اَمْرٍحَکِیْمٍ وَّیُبْرَمُ، اَنْ تَکْشِفَ عَنَّا مِنَ الْبَلَآءِ وَالْبَلْوَآءِ مَانَعْلَمُ وَمَالَانَعْلَمُ وَاَنْتَ بِہٖٓ اَعْلَمُ، اِنَّکَ اَنْتَ الْاَعَزُّ الْاَکْرَمْ، وَصَلَّی اللہُ تَعَالیٰ عَلٰی سَیِّدِنَامُحَمَّدٍ،وَّعَلیٰ اٰلِہٖ وَصَحْبِہٖ وَسَلَّمَ، وَالْـحَمْدُلِلہِ رَبِّ العٰلَمِیْنَ۔

اس رات کی ۱۰۰ ر کعتیں
حضوراقدس ﷺ نے فرمایا جواس رات میں ۱۰۰ رکعت نماز نفل پڑھے گا، اللہ تعالیٰ اس کے پاس سوفرشتے بھیجےگا۔ تیس فرشتے اس کوجنت کی بشارت دیں گے، تیس فرشتے اس کوجہنم سے بےخوفی کی خوش خبری سنائیں گے، تیس فرشتے دنیوی آفتیں، اس سے ٹالتے رہیں گے اوردس فرشتے، اس کوشیطان کے مکر وفریب سے بچاتے رہیں گے۔(صاوی شریف)
حضورحافظِ ملت ، حضرت مولانا عبدالعزیز محدث مبارک پوری ، بانی جامعہ اشرفیہ مبارک پورہند،اس نماز کےبڑے پابند تھے، سفر میں ہوتے، تب بھی یہ ۱۰۰ رکعتیں پابندی سے پڑھا کرتے۔
(بروایت برادر محترم استاذ گرامی حضرت مولانا محمداحمدمصباحی دامت برکاتہم)
اس رات کی دعا
اَللّٰهُمَّ اِنِّی اَسْئَلُکَ الْعَفْوَ وَالْعَافِیَۃَ وَالْمُعَافَاۃَ الدَّائِمَۃَ فِی الدِّیْنِ وَالدُّنْیَا وَالْاٰخِرَۃِ۔
(ماثبت من السنۃ)
اس رات میں نبی اکرم ﷺ کے اعمال
حضرت عائشہ صدیقہ رضی اللہ تعالیٰ عنہما فرماتی ہیں کہ میں نے دیکھا کہ حضور ﷺ بقیع الغرقد ( مدینہ منورہ کے قبرستان) میں تشریف لے گئے۔اورمسلمان مردوں، عورتوں اورشہیدوں کےلیےدعافرمائی۔پھر قبرستان سے واپس ہوکر نماز میں مشغول ہوگئے اورسجدے میں بڑی دیر تک ، اپنے پروردگار سے دعا کرتے رہے۔ پھر سجدے سے سراٹھا کردیر تک یہ دعا کی:
اَللّٰهُمَّ ارْزُقْنِیْ قَلْبًا تَقِیًّا، مِّنَ الشِّرْکِ نَقِیًّا، لَافَاجِراً ، وَّلَاشَقِیًّا۔
یااللہ ! مجھے پرہیز گاردل عطا کر، جوشرک سے پاک وصاف ہو، جونہ بد کار ہو، نہ بد نصیب ۔
اس رات کی فاتحہ
یہ رات اپ نےمُردوں اوردوسرے بزرگوں کی روحوں کو ثواب پہنچانےاورفاتحہ دلانے کے لیےبڑے خاص رات ہے ، حضرت ابن عباس رضی اللہ عنہما سے روایت ہے کہ عید اورعاشورہ اور رجب کے پہلے جمعہ کےدن اور شعبان کی پندرہویں رات( شب براءت) اورجمعہ کی رات میں مُردوں کی روحیں اپنے گھروں کےدروازوں پر جاکر پکار تی ہیں اے گھر والو! ہمارے اوپر رحم وکرم اورمہربانی کرو ، آج کی رات میں ہمارے لیے کچھ صدقہ کرو،کیوں کہ ہم لوگ ایصالِ ثواب کے محتاج ہیں، ہمارے اعمال ختم کردیے گئے اور تمہارے نامۂ اعمال جاری ہیں پس اگر یہ روحیں کچھ نہیں پاتیں، تو حسرت وناامیدی کے ساتھ واپس چلی جاتی ہیں۔

شعبان کا روزہ
نبی اکرم ﷺ ارشاد فرماتے ہیں: جب شعبان کی پندرہویں رات آجائے تواس رات کو قیام کرو اوردن میں روزہ رکھو کہ رب تبارک وتعالیٰ غروب آفتاب سے آسمان دنیا پر خاص تجلی فرماتاہے۔ اور فرماتاہے کہ ہے کوئی بخشش چاہنے والا کہ اسے بخش دوں،ہے کوئی روزی طلب کرنے والا کہ اسے روزی دوں، ہے کوئی ایسا ،ہے کوئی ایسا، اور یہ اس وقت تک فرماتاہے کہ فجر طلوع ہوجائے۔(ابن ماجہ،ملخصا ًموسم ِرحمت : از علامہ عبدالمصطفیٰ اعظمی ، رحمۃ اللہ تعالیٰ علیہ)
لِہٰذَا ، ہمیں چاہیے کہ اس خدائی رات کااستقبال، طاعت وعبادت کےساتھ کریں، اس رات ، دُرود خوانی، توبہ و استغفار، تلاوتِ قرآن، نوافل و عبادات ، ذکر و اذکار وغیرہ میں مشغول ہوں، کثرت سے صدقہ وخیرات کریں اور پندرہویں شعبان کےدن میں روزہ رکھ کر، اللہ تعالیٰ کی خوش نودی حاصل کریں۔

اَلْاِسْلامی.نیٹ
AL islami.net (AL-ISLAMI)

 

احکام قربانی وعقیقہ، احمد القادری
احکام قربانی
بِسْمِ اللّہِ الرَّحْمٰنِ الرَّحِیْم
قَالَ یٰبُنَیَّ اِنِّیْ اَرَ یٰ فیِ الْمَنَامِ اَنِّیْ اَذْ بَحُکَ فَانْظُرْ ماَذَا تَرَیٰ قَال یٰأَ بَتِ افْعَلْ
مَاتُؤ مَرُ سَتَجِدُنِي اِنْ شَاءَ اللّٰہُ مِن الصّٰبِرِیْنَ۔
(قرآن کریم سورۃ ۳۷ :آیت ۱۰۲)
اے میرے فرزند! میں نے خواب دیکھا ہے کہ تمھیں ذبح کررہا ہوں اب دیکھو تمھاری کیا رائے ہے؟ —— اللہ کے دوست حضرت ابراہیم علیہ السلام نے فرمایا۔
ابا جان ! اسے کیجیے جس بات کا آپ کو حکم ہوتا ہے ۔ ان شاء اللہ عنقریب مجھے صابر پائیں گے۔
ان کے پیارے بیٹے حضرت اسمٰعیل علیہ السلام نے جواب دیا ۔
اے مسلمان سن یہ نکتہ درسِ قرآنی میں ہے
عظمتِ اسلام ومسلم، صرف قربانی میں ہے
زندگیِ جا وداں، مومن کی قربانی میں ہے
لذتِ آب بقا، تلوار کے پانی میں ہے
بسْمِ اللّہِ الرَّحْمٰنِ الرَّحِیْم۵
نَحْمَدُہ وَنُصَلِّیْ عَلیٰ رَسُوْلِہِ الْکَرِیْم
{فضائل ومَسائل قربانی}
قربانی:
مخصوص جانور کا ایام ِنحر میں ،بہ نیت ِتَقَرُّبْ، ذبح کرنا قربانی ہے۔
قربانی حضرت ابراہیم علیہ السلام کی سنت ہے ۔ مسلمانوں کو قربانی کرنے کا حکم دیا گیا ۔ خدا وند کریم کا ارشاد ہے فَصَلِّ لِرَبِّکَ وَانْحَر اپنے رب کے لیے نماز پڑھو اور قربانی کرو۔(سورۃ ۱۱۰: آیت ۲)
{احادیث وآثار }
حد یث۱ } حضرت زیدبن ارقم رضی اللہ عنہ سے روایت ہے وہ کہتے ہیں کہ نبی اکرم صلی اللہ علیہ وسلم سے صحابہ کرام نے عرض کیا۔ یا رسول اللہ ! قربانیاں کیا ہیں ؟ آپ نے نے فرمایا یہ تمھارے باپ ابراہیم (علیہ السلام) کی سنت ہے، صحابہ نے عرض کیا یارسو ل اللہ! ہمیں اس میں کیا ثواب ملے گا ؟ فرمایا ہر بال کے بدلے ایک نیکی۔(احمد ،ابن ماجہ)
حد یث۲} حضرت عائشہ رضی اللہ تعالیٰ عنہا سے روایت ہے کہ رسول اللہ ﷺنے فرمایا۔ قربانی کے دنوں میں ابن آدم کا ،کوئی عمل اللہ تعالیٰ کے نزدیک خون بہانے (یعنی قربانی کرنے ) سے زیادہ پیارا نہیں، اور وہ جانور قیامت کے دن اپنے سینگوں ، بالوں، کھروں کے ساتھ آئے گا ،اور قربانی کا خون زمین پر گرنے سے پہلے اللہ تعالیٰ کے نزدیک مقامِ قبول میں پہنچ جاتا ہے۔ (ترمذی،ابن ماجہ)
حد یث۳ } حضرت ابوہریرہ رضی اللہ تعالیٰ عنہ سے روایت ہے کہ نبی اکرم صلی اللہ علیہ وسلم نے فرمایا، جس میں وسعت ہو اور قربانی نہ کرے تو وہ ہماری عید گاہ کے قریب ہرگز نہ آئے ۔ (ابن ماجہ)
حد یث۴} حضرت ابن عباس رضی اللہ تعالیٰ عنہما سے روایت ہے کہ نبی صلی اللہ تعالیٰ علیہ وسلم نے فرمایا ۔ جومال عید کے دن قربانی میں خرچ کیاگیا اس سے زیادہ کوئی مال پیارا نہیں ۔ (طبرانی)
حد یث۵} امام احمد رضی اللہ تعالیٰ عنہ نے روایت کی رسول اللہ صلی اللہ تعالیٰ علیہ وسلم نے فرمایا۔ افضل قربانی وہ ہے جو باعتبارِ قیمت اعلیٰ اور خوب فربہ ہو ۔ (امام احمد)
حدیث۶} حضرت علی کرم اللہ وجہہ الکریم سے روایت ہے کہ رسول اللہ صلی اللہ تعا لی ٰ علیہ وسلم نے فرمایا ،چار قسم کے جانور قربانی کے لیے درست نہیں ۔(۱) کانا: جس کا کانا پن ظاہر ہو(۲) بیمار : جس کی بیماری ظاہر ہو(۳)لنگڑا : جس کا لنگ ظاہر ہو (۴) لاغر: ایسا جس کی ہڈیوں میں مغز نہ ہو۔ (امام احمد، ترمذی ، ابوداؤد ، نسائی، ابن ماجہ، دارمی)
حد یث ۷ } حضرت علی رضی اللہ عنہ سے روایت ہے کہ رسول اللہ صلی اللہ علیہ وسلم نے کان کٹے، اور سینگ ٹوٹے ہوئے کی، قربانی سے منع فرمایا۔ (امام احمد، ابن ماجہ)
حد یث۸} حضرت عبد ا للہ ابن مسعو د رضی ا للہ تعا لیٰ عنہ سے روایت ہے کہ نبی ﷺنے فرمایا ۔قربانی میں گائے سات کی طرف سے، اور او نٹ سات کی طرف سے ہے۔ (طبرانی)
حد یث۹} حضرت ابن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے، رات میں قربانی کرنے سے منع فرمایا ۔
حدیث۱۰} حضرت ام سلمہ رضی اللہ تعالیٰ عنہا سے روایت ہے ، کہ رسول اللہ صلی اللہ تعالیٰ علیہ وسلم نے فرمایا۔ جب تم ذی الحجہ کا چاند دیکھو اور تم میں کا کوئی قربانی کرنا چاہے تو اس کوچاہئے کہ بال منڈانے، یا ترشوانے، اور ناخن کٹانے سے رکا رہے ۔ (مسلم)
حدیث۱۱} حضرت عبد اللہ ابن عمررضی اللہ عنہما سے روایت ہے کہ رسول اللہ صلی اللہ تعالیٰ علیہ وسلم نے فرمایا ۔مجھے یوم اضحی کاحکم دیا گیا، اس دن کو خدا نے اس امت کے لیے عید بنایا ہے ۔ ایک شخص نے عرض کیا یا رسول اللہ ! یہ بتائیے کہ میرے پاس منیحہ۱ ؎کے سوا کوئی جانور نہ ہو تو کیا اسی کی قربانی کروں ؟ فرمایا نہیں ۔ ہاں تم اپنے بال، ناخن، اور مونچھیں ترشواؤ اورموئے زیر ناف مونڈ و، اسی میں تمھاری قربانی خدا کے نزدیک پوری ہوجائے گی ۔( ابو داؤد ،نسائی )
یعنی جس کو قربانی کی توفیق نہ ہوا سے ان چیزوں کے کرنے سے قربانی کا ثواب حاصل ہوجائے گا ۔
۱ ؎ منیحہ: ایسادودھ والا جانور جس سے فائدہ اٹھانے کے لئے کسی کو دیاگیا ہو۔ اس صورت میں اسے جانور کے دودھ سے نفع اٹھانے کا اختیار ہے۔لیکن منیحہ کا مالک نہیں ہوتا، اس لئے اس جانورکی قربانی بھی نہیں کرسکتا، جب تک اس جانور کو مالک سے خرید نہ لے ، یا مالک اسے ھبہ نہ کردے۔
{چند اہم مسائل}
مسئلہ ۱ : قربانی کے مسئلے میں صاحبِ نصاب وہ شخص ہے جو ساڑھے باون تولے، ( 612.412گرام ،یا 19.755 اونس) چاندی یا ساڑھے سات تولے،( 87.487گرام، 2.822 اونس) سونے کا مالک ہو ۔ یا ان میں سے کسی ایک کی قیمت کا، سامانِ تجارت یا سامانِ غیر تجارت ، یا اتنے نقد روپیوں کا مالک ہو اور مملوکہ چیزیں حاجتِ اصلیہ سے زائد ہوں۔
مسئلہ۲: حاجتِ اصلیہ یعنی جس کی زندگی بسر کرنے میں آدمی کو ضرورت ہے۔ اس کی وجہ سے قربانی واجب نہیں ، نہ اس میں زکوٰۃ واجب ہے جیسے رہنے کا مکان ، جاڑے گرمیوں میں پہننے کے کپڑے ، خانہ داری کے سامان ، سواری کے جانور یا گاڑیاں ، پیشہ وروں کے اوزار، اہلِ علم کے لیے حاجت کی کتابیں ۔
مسئلہ۳: کتاب سے مراد قرآن ، تفسیر، حدیث، اصول حدیث، فقہ اصول فقہ ، علمِ کلام اور اخلاق وغیرہ مذہبی کتابیں ہیں۔ اسی طرح طب کی کتابیں ،طبیب کے لیے حاجتِ اصلیہ سے ہیں ۔
مسئلہ۴: ان کے علاوہ نحو، صرف، نجوم، قصے ، کہانی ، دیوان وغیرہ کتب اور مذہبی کتابوں کے ایک سے زائد نسخے حاجتِ اصلیہ سے نہیں۔ اگر ان کی قیمت، نصاب کو پہنچے تو اس پر قربانی واجب ہے ۔
مسئلہ۵: حافظ کے لیے قرآنِ مجید حاجتِ اصلیہ سے نہیں ۔
مسئلہ۶: مسافر پر قربانی واجب نہیں، اگرچہ مالدار ہو ۔ ہاں نفل کے طور پر چاہے تو کرسکتا ہے ۔
مسئلہ۷: عورت کے پاس باپ کا دیا ہوازیور ،یا کوئی اور سامان، جو اس کی ملک ہے، اگر وہ نصاب کی قیمت کے برابر ہو، تو عورت پر بھی قربانی واجب ہے ۔
مسئلہ۸ : جو مالک ِنصاب، اپنے نام سے ایک بار قربانی کرچکا ہے اور دوسرے سال بھی وہ صاحب ِنصاب ہے، تو اس پر اپنے نام سے قربانی کرنا واجب ہے ۔ یہی حکم ہر سال کا ہے ۔
حدیث میں ہے۔ اِنَّ عَلیٰ کُلِّ اھْلِ بَیْتٍ فِی کُلِّ عَامٍ اُضْحِیَّۃً (ترمذی)
مسئلہ۹: اگر کوئی صاحب ِنصاب، اپنی طرف سے قربانی کرنے کے بجائے ، دوسرے کی طرف سے کردے ، اور اپنے نام سے نہ کرے، تو سخت گنہ گار ہوگا۔ لہذا، اگر دوسرے کی طرف سے کرنا چاہتا ہے، تو اس کے لیے، ایک دوسری قربانی کا انتظام کرے۔
{قربانی کے جانور}
مسئلہ۱۰:اونٹ ،گائے ،بھینس، بکری،بھیڑ، دنبہ، نر ہو یا مادہ ، خصی ہو یا غیرخصی، سب کی قربانی جائز ہے ۔
مسئلہ۱۱:اونٹ پانچ سال کا، گائے بھینس دوسال کی ،بکری بھیڑ دنبہ، ایک سال کاہوناضروری ہے۔ اس سے کم عمرہو، تو قربانی جائز نہیں،اگر زیادہ ہو تو جائز ،بلکہ افضل ہے۔ ہاں صرف بھیڑیا دنبہ کا چھ ماہ کا بچہ، اگر اتنا بڑا ہو، کہ دورسے دیکھنے میں، ایک سال کا معلوم ہوتا ہو، تو اس کی قربانی جائز ہے ۔
مسئلہ۱۲ : صاحب نصاب پر ایک بکری کا ذبح کرنا یا اونٹ، گائے، بھینس کا ساتواں حصہ واجب ہے ۔ ساتویں حصہ سے کم نہیں ہوسکتا۔
مسئلہ۱۳:ساتویں حصہ سے زیادہ مثلاً گائے، بھینس کو چھ یا پانچ شخصوں کی طرف سے قربانی کریں تو ہوسکتا ہے ۔ بلکہ پوری گائے ایک شخص اپنی طرف سے کرسکتا ہے۔
{ایام قربانی}
مسئلہ۱۴: قربانی کا وقت دسویں ذی الحجہ کے طلوع صبح صادق سے، بارہویں کے غروب آفتاب تک ہے، یعنی تین دن، دو راتیں۔
مسئلہ۱۵: قربانی کے لیے دسویں تاریخ، سب میں افضل ہے، پھر گیارہویں ، پھر بارہویں ۔
مسئلہ ۱۶: شہر میں نماز عید سے پہلے، قربانی کرنا جائز نہیں ۔
{گوشت وجلد کے احکام }
مسئلہ۱۷ : قربانی کا گوشت خود بھی کھا سکتا ہے، اوردوسرے شخص، غنی یا فقیر کو دے سکتا ہے یا کھلا سکتا ہے، بلکہ اس میں سے کچھ کھالینا ، قربانی کرنے والے کے لیے مستحب ہے ۔
مسئلہ۱۸ :قربانی کرنے والے کے لیے افضل یہ ہے کہ دسویں ذی الحجہ کو صبح سے کچھ نہ کھائے پیئے، جب قربانی ہوجائے تو اسی کے گوشت سے افطار کرے۔
مسئلہ۱۹: بہتر یہ ہے کہ گوشت کے تین حصے کرے، ایک حصہ فقرا ء ومساکین کے لیے ، ایک حصہ احباب ورشتہ دار کے لیے، ایک حصہ اپنے گھر والوں کے لیے ، اگر اہل وعیال زیادہ ہوں تو کل گوشت بھی گھروالوں کو کھلا سکتا ہے ۔
مسئلہ۲۰: میت کی طرف سے قربانی کی، تو اس کا گوشت خود بھی کھا سکتا ہے اور احباب کو بھی کھلا سکتا ہے ، جبکہ میت نے وصیت نہ کی ہو، ورنہ کل گوشت صدقہ کردے۔
مسئلہ۲۱: قربانی اگر منت ہے تو اس کا گوشت نہ خود کھا سکتا ہے نہ اغنیاء کو کھلا سکتا ہے بلکہ اسے صدقہ کردینا واجب ہے ۔ منت ماننے والا فقیر ہو یا مالدار ۔
مسئلہ۲۲ : قربانی کا گوشت کا فر کو دینا جائز نہیں ۔
مسئلہ۲۳ : قربانی کا چمڑا یاگوشت یا اس کی کوئی چیز قصاب یا ذبح کرنے والے کو اجرت میں دینا جائز نہیں ۔
{چرم قربانی }
مسئلہ۲۴ : قربانی کا چمڑا بیچ کر قیمت، اپنے مصرف میں لانا جائز نہیں ۔ ہاں چمڑا، اپنے استعمال میں لاسکتا ہے ۔
مسئلہ۲۵: آج کل اکثر لوگ کھال دینی مدارس میں دیا کرتے ہیں یہ افضل اور بہت زیادہ ثواب کا باعث ہے۔ بعض مرتبہ وہاں کھال بھیجنے میں دقت ہوتی ہے، تو اسے بیچ کر قیمت بھیج دیتے ہیں، اس میں بھی حرج نہیں ۔
{ذبح کا طریقہ}
مسئلہ۲۶: ذبح میں چار رگیں کاٹی جاتی ہیں ۔ چاروںرگوں میں سے تین کٹ گئیں یا ہر ایک کا اکثر حصہ تو ذبیحہ حلال ہے ۔
مسئلہ۲۷ : ذبح کرنے میں قصداً بِسْمِ اللہِ اللہُ اَکْبَرْ نہ کہا (یعنی اللہ کا نام نہ لیا ) توجانور حرام ہے ۔ اور بھول کر ایسا ہو اتو حلال ہے۔
مسئلہ۲۸: اگر پور اذبح کرنے سے پہلے قصاب کے حوالے کیا ،تو اس کے لیے بھی ضروری ہے کہ بِسْمِ اللہِ اللہُ اَکْبَرْ، کہہ کر ہی ہاتھ لگائے۔
مسئلہ۲۹ : اس طرح ذبح کرنا کہ چھری حرام مغز تک پہنچ جائے یا سرکٹ کر جداہوجائے مکر وہ ہے، مگروہ ذبیحہ کھایا جائے گا ۔ یعنی کراہت اس فعل میں ہے، ذبیحہ میں نہیں ۔
مسئلہ۳۰ : ذبح میں عورت کا وہی حکم ہے جو مرد کا ہے یعنی دونوں کا ذبیحہ جائز ہے۔
مسئلہ۳۱ : مشرک اور مرتد کا ذبیحہ مردار اور حرام ہے ۔
{قربانی کا طریقہ}
مسئلہ۳۲ : قربانی کا جانور بائیں پہلو پر اس طرح لٹائیں کہ اس کا منہ قبلہ کی طرف ہو ،اوراپنا دایاں پاؤں ،اس کے پہلو پر رکھیں ۔ اورذبح سے پہلے یہ دعا پڑھیں۔
اِنِّیّ وَجَّھَتُ وَجْھِیَ لِلَّذِیْ فَطَرَ السَّمٰوَاتِ وَالاَرْضَ حَنِیْفاًوَّمَا اَنَامِنَ المُشْرِکِیْنَ0 اِنَّ صَلاَ تِیْ وَنُسُکِیْ وَمَحْیَایَ وَمَمَاتِیْ لِلّٰہِ رَبِّ العٰلَمِیْنَ ،لاَشَرِیْکَ لَہٗ وَبِذَلِکَ اُمِرْ تُ وَاَنَا مِنَ الْمُسْلِمِیْنَ0
پھر اَ للّٰھُمَّ لَکَ وَمِنْکَ بِسْمِ اللہِ اَللہُ اَکْبَرْ پڑھتے ہوئےتیز چھری سے ذبح کرے ۔ قربانی اپنی طرف سے ہو، توذبح کے بعد یہ دعا پڑھیں۔اَللّٰھُمَّ تَقَبَّلْ مِنِّی کَماَ تَقَبَّلْتَ مِنْ خَلِیْلِکَ اِبْرَ اھِیْمَ وَحَبِیْبِکَ مُحَمَّدٍ عَلَیْھِمَاالصَّلاۃُ وَالسَّلامُ ۔
اگردوسرے کی طرف سے ذبح کرنا ہے تو مِنِّی کی جگہ مِنْ کے بعداس کا نام لے۔
مسئلہ۳۳: اگر وہ جانور مشترک ہے تو اس طرح لکھ کر ذبح کے بعد پڑھ لیں ۔
اَللّٰھُمَّ تَقَبَّلْ مِنْ
(۱)……………ابن……………
(۲)……………ابن……………
(۳)……………ابن……………
(۴)……………ابن……………
(۵)……………ابن……………
(۶)……………ابن……………
(۷)……………ابن……………
کَمَاتقَبَّلْتَ مِنْ خَلِیْلِکَ اِبْرَاھِیْمَ وَحَبِیْبِکَ مُحَمَّدٍ عَلَیْھِمَاالصَّلاۃُ وَالسَّلامُ ۔
{نماز عیدین}
مسئلہ۳۴: عید کے دن غسل کرنا ، اچھے کپڑے پہننا ، خوشبو لگانا، ایک راستہ سے عیدگاہ جانا، دوسرے سے واپس آنا ، راستہ میں تکبیر کہتے ہوئے جانا مستحب ہے ۔ عید الفطر میںتکبیر آہستہ اور صبح کچھ میٹھا کھا کر عیدگاہ جانا مستحب ہے، مگر عید الاضحی میں تکبیر ، بلند آواز سے کہتے ہوئے جانا اور صبح سے قربانی کرنے تک کچھ نہ کھانا پینا، مستحب ہے ۔ عید ین کی نماز ’’دو رکعت ‘ ‘ واجب ہے بِسْمِ اللہِ اَللہُ اَکْبَرْ ۔
{نماز عیدین کا طریقہ}
مسئلہ۳۵: پہلے یوں نیت کرے، نیت کی میں نے دورکعت نماز عید… کی واجب، چھ زائد تکبیروں کے ساتھ، منھ میرا کعبہ شریف کی طرف، اللہ کے واسطے، اَللہُ اکْبَر کہتے ہوئے ہاتھ باندھ لے۔ امام ثنا پڑھے گا، تین زائد تکبیر کہے گا ۔پہلی دو تکبیروں میں کانوں تک ہاتھ لے جائے اور اَللہُ اَکْبَر کہتا ہوا ہاتھ چھوڑ دے، تیسری تکبیر میں کانوں تک ہاتھ لے جائے اور اَللہُ اکْبَر کہتے ہوئے ہاتھ باندھ لے۔ ایک رکعت پوری کر کے دوسری رکعت کے رکوع سے پہلے تین زائد تکبیریں کہے۔ تینوں میں کانوں تک ہاتھ لے جائے اور اَللہُ اکْبَر کہتا ہوا ہاتھ چھوڑدے۔ چوتھی تکبیر رکوع کی ہوگی۔ اس میں ہاتھ اٹھائے۔ سلام کے بعد امام خطبہ پڑھے گا، سامعین متوجہ ہوکر سنیں ۔ خطبہ کے بعد دعا ، مصافحہ اور معانقہ مستحب ہے ۔
{ تکبیـر تـشریق }
مسئلہ۳۶: نویں ذی الحجہ کی فجر سے تیرہویں کی عصر تک جو نماز جماعت کے ساتھ ادا کی گئی ہو ہر نماز کے بعد ایک بار کہنا واجب اور تین بار افضل ہے تکبیر یہ ہے۔ اَللہُ اَکْبَرْاَللہُ اَکْبَرْ،لاَ اِلٰہَ اِلَّا اللہُ، وَاللہُ اَکْبَرْ،اَللّٰہُ اَکْبَر، وَلِلّٰہِ الْحَمْدْo
{احکامِ عقیقہ}
بچہ پیداہونے کے شکریہ میں ،جو جانور ذبح کیا جاتا ہے، اس کو عقیقہ کہتے ہیں ۔ عقیقہ مباح ومستحب ہے، نبی اکرم صلی اللہ علیہ وسلم نے خود عقیقہ کیا ہے، اور اس کی احادیث میں بڑی فضیلت آئی ہے ۔
{احادیث وآثار}
حدیث۱: حضرت سلمان بن عامرضبی رضی اللہ عنہ سے روایت ہے کہ رسول اللہ صلی علیہ وسلم نے فرمایا لڑکے کے ساتھ عقیقہ ہے اس کی طرف سے خون بہاؤ(یعنی جانوذبح کرو)۔ (بخاری)
حدیث۲: حضرت ام کرز رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا لڑکے کی طرف سے دوبکریاں ، اور لڑکی کی طرف سے ایک۔ اس میں حرج نہیں کہ نرہوں یا مادہ ۔
(ابوداؤد ، ترمذی ، نسائی)
حد یث۳: حضرت سمرہ بن جندب رضی اللہ عنہ سے روایت ہے کہ رسول اکرم صلی اللہ علیہ وسلم نے فرمایا لڑکا اپنے عقیقہ میں گروی ہے۔ ساتویں دن اس کی طرف سے جانور ذبح کیا جائے اور اس کا نام رکھا جائے اور سر مونڈاجائے ۔
(ابوداؤد ، ترمذی ، نسائی )
گروی ہونے کا مطلب یہ ہے، کہ جب تک عقیقہ نہ کیا جائے، اس سے پورا نفع حاصل نہ ہوگا۔
بعض نے کہا، بچہ کی سلامتی اور اس کی نشو ونما اور اس میں اچھے اوصاف ہونا، عقیقہ کے ساتھ وابستہ ہیں ۔
حدیث۴: حضرت بریدہ رضی اللہ عنہ سے روایت ہے کہ فرماتے ہیں۔ زمانہ ٔ جاہلیت میں، جب ہم میں سے کسی کے بچہ پیدا ہوتا، تو بکری ذبح کرتا اور اس کا خون بچے کے سر پر مل دیتا۔ اب جبکہ اسلام آیا تو ہم ساتویں دن بکری ذبح کرتے ہیں اور بچہ کا سر منڈاتے ہیں اور اس پر زعفران لگاتے ہیں۔ (ابودؤد)
حدیث۵: حضرت ابورافع رضی اللہ عنہ سے روایت ہے جب حضرت امام حسن بن علی رضی اللہ عنہما پیدا ہوئے، تو میں نے دیکھا کہ نبی صلی اللہ علیہ وسلم نے ان کے کانوں میں وہی اذان کہی جو نماز کے لیے کہی جاتی ہے ۔ (ابوداؤد ، ترمذی)
{چند فقہی مسائل}
مسئلہ۱ : عقیقہ کے لیے ساتواں دن بہتر ہے، اور ساتویں دن نہ کرسکے تو جب چاہے کرسکتا ہے ۔ سنت ادا ہوجائے گی۔
مسئلہ۲: زندگی میں جب بھی عقیقہ کرے تو ساتویں دن کا لحاظ کرنا بہتر ہے۔ اس کا آسان طریقہ یہ ہے کہ بچہ کے پیدائش کے دن کو یاد رکھیں اور جب بھی عقیقہ کرنا ہو اس سے ایک دن پہلے کریں ۔ مثلاً جمعہ کو کوئی بچہ پیدا ہوا ہو تو عقیقہ جمعرات کو کریں ۔ اس میں ساتویں دن کا حساب ضرور آئے گا۔
مسئلہ۳: عقیقہ کے جانور کی بھی وہی شرطیں ہیں جو قربانی کے جانور کی ہیں۔
مسئلہ۴: لڑکے کے عقیقہ میں بکر ا،اور لڑکی کے عقیقہ میں بکری ذبح کی جائے۔ یعنی لڑکے میں نرَ اور لڑکی میں مادَہ کرنا مناسب ہے ، اگر برعکس کیا جب بھی حرج نہیں۔
مسئلہ۵: بہتر ہے کہ اس کی ہڈی نہ توڑی جائے بلکہ ہڈیوں سے گوشت اتار لیا جائے، یہ بچہ کی سلامتی کی نیک فال ہے ۔ اگر ہڈی توڑدی جب بھی حرج نہیں۔
مسئلہ۶: گوشت کو جس طرح چاہیں پکاسکتے ہیں ۔ لیکن میٹھا پکانا ،بچہ کے اخلاق اچھے ہو نے کی فال نیک ہے ۔
مسئلہ۷ : عقیقہ کا گوشت، بچہ کے ماں، باپ، دادا، دادی، نانا، نانی وغیرہ تمام افراد کھا سکتے ہیں ۔ اور بطور ضیافت، دوست واحباب کو بھی کھلایا جاسکتا ہے ۔
مسئلہ۸ : بعض فقہاء کا یہ بھی کہنا ہے کہ سری، پائے حجام کو اور ایک ران دائی کو دیں۔باقی گوشت کے تین حصے کریں ایک حصہ فقراء کا ، ایک احباب کا اور ایک حصہ گھر والے کھائیں ۔
مسئلہ۹: لڑکے کے عقیقہ میں، دو بکر یوں کی جگہ ایک ہی بکری کسی نے کی تو یہ بھی جائز ہے ۔
مسئلہ۱۰: قربانی کے جانور (گائے ، بھینس وغیرہ) میں عقیقہ کی شرکت ہوسکتی ہے ۔
مسئلہ۱۱: اس کی کھال کا وہی حکم ہے جو قربانی کی کھال کا ہے ۔
{ عقیقہ کا طریقہ}
مسئلہ۱۲: عقیقہ کے جانور کو بائیں پہلو پر اسی طرح لٹا ئیں کہ اس کا رخ قبلہ کی جانب ہو اور ذبح سے پہلے یہ دعا پڑئیں۔
لڑکے کی دعا
اَللّٰھُمَّ ھٰذِہِ الْعَقِیْقَۃُ لِاِبْنِیْ (لڑکے کا نام لیں ) دَمُھَابِدَمِہٖ وَلَحْمُھَا بِلَحْمِہٖ وَعَظْمُھَا بِعَظْمِہٖ وَجِلْدُ ھَا بِجِلْدِہٖ وَشَعْرُ ھَا بِشَعْرِہٖ اَللّٰھُمَّ اجْعَلْھَا فِدَائً لِّابْنِیْ مِنَ الْنَّارo اِنِیّ وَجَّھْتُ وَجْھِیَ لِلَّذِیْ فَطَرَالسَّمٰواتِ وَالارضَ حَنِیْفاًوَّ مَا اَنَا مِنَ الْمُشْرِکِیْنَo اِنَّ صَلاَتِی وَنُسُکِیْ وَ مَحْیَا یَ وَمَمَاتِیْ لِلّٰہِ رَبِّ العٰلَمِیْنَo لاَشَرِیْکَ لَہٗ وَبِذٰلِکَ اُمِرْتُ وَاَنَا مِنَ الْمُسْلِمِیْنَo
لڑکی کی دعا
اَللّٰھُمَّ ھٰذِہِ الْعَقِیْقَۃُ لِبِنْتِیْ (لڑکی کا نام لیں ) دَمُھَابِدَمِھَا وَلَحْمُھَا بِلَحْمِھَا وَعَظْمُھَا بِعَظْمِھَا وَجِلْدُ ھَا بِجِلْدِھَا وَشَعْرُ ھَا بِشَعْرِھَا اَللّٰھُمَّ اجْعَلْھَا فِدَائً لِّبِنْتِیْ مِنَ الْنَّارِo اِنِّیْ وَجَّھْتُ وَجْھِیَ لِلَّذیْ فَطَرَالسَّمٰواتِ وَالارضَ حَنِیْفاًوَّ مَا اَنَا مِنَ الْمُشْرِکِیْنَ o اِنَّ صَلاَتِی وَنُسُکِیْ وَ مَحْیَا یَ وَمَمَاتِیْ لِلّٰہِ رَبِّ العٰلَمِیْنَo لاَشَرِیْکَ لَہٗ وَبِذٰلِکَ اُمِرْتُ وَاَنَا مِنَ الْمُسْلِمِیْنَo
پھر  اَللّٰھُمَّ لَکَ وَمِنْکَ بِسْمِ اللہِ اَللہُ اَکْبَرْ ۔ پڑھ کرتیزی چھری سے ذبح کردیں ۔
نوٹ: عقیقہ کی دعا ،اپنا لڑکا یا لڑکی ہو تو مندرجہ بالا طریقہ پر پڑھیں، لیکن اگر دوسرے کا لڑکا ہو تو خط کشیدہ عبارتوں میں لِ کے بعد اِبْنِی ہٹا کر لڑکے اور اس کے باپ کا نام لے ۔ مثلاً لِعَبْدِ الرَّحْمٰنِ بْنِ عَبْدِالْعَزِیْز اسی طرح دوسرے کی لڑکی ہو تو خط کشیدہ عبارتوں میں لِ کے بعد بِنْتِی ہٹا کر لڑکی اور اس کے باپ کا نام لے۔(مثلاً  لِفَاطِمَۃ بِنْتِ خَالِد ) اس کے علاوہ اور کوئی ترمیم نہیں ہوگی۔
احمد القادری
اَلْاِسْلامی.نیٹ
AL islami.net (AL-ISLAMI)
مآ خذ و مراجع
(۱) قرآن کریم
(۲) کنز الایمان، امام احمد رضا قادری، رحمۃ اللہ علیہ(۱۲۷۲۔۱۳۴۰ھ)
(۳) صحیح بخاری، امام ابو عبداللہ محمد بن اسمعیل بخاری ،رحمۃاللہ علیہ (متوفی۲۵۶ھ)
(۴) صحیح مسلم، امام ابوالحسین مسلم بن حجاج قشیری ،رحمۃاللہ علیہ (متوفی۲۶۱ھ)
(۵) جامع ترمذی، امام ابو عیسی محمد بن عیسی ترمذی ،رحمۃاللہ علیہ (متوفی ۲۷۹ ھ)
(۶) سنن ابو داؤد، امام ابو داؤدسلیمان بن اشعث، رحمۃاللہ علیہ (متوفی۲۷۵ھ)
(۷) سنن نسائی، امام ابو عبدالرحمٰن احمد بن شعیب نسائی، رحمۃاللہ علیہ (متوفی ۳۰۳ھ(
(۸) ابن ماجہ،امام محمدبن یزید ابن ماجہ، رحمۃاللہ علیہ(متوفی ۲۷۳ھ)
(۹) طبرانی، امام حافظ ابو القاسم سلیمان بن احمد ایوب اللخمی الطبرانی ، رحمۃاللہ علیہ (متوفی۳۶۰ھ)
(۱۰) مشکوۃ، شیخ ولی الدین تبریزی ،رحمۃاللہ علیہ( متوفی۷۴۲ھ)
(۱۱) بہار شریعت، صدرالشریعہ،مولانا امجدعلی اعظمی، رحمۃ اللہ علیہ (۱۲۹۶۔۱۳۶۷ھ)
(۱۲) قانونِ شریعت ، شمس العلما ، مولانا قاضی شمس الدین ، جون پوری، رحمۃ اللہ علیہ
(۱۳۲۲ ھ ۔ ۱۴۱۰ ھ)
(۱۳) انوارُالحدیث، فقیہ ملت، مولانا مفتی جلال الدین احمد امجدی ، رحمۃ اللہ علیہ
(۱۳۵۲ ھ۔ ۱۴۲۲ ھ)
برکات اولیا، احمد القادری

برکاتِ اولیا ء اللہ

اَلْحَمْدُ لِلّٰهِ رَبِّ الْعٰلَمِیْنَ ۔ وَالصَّلاَۃُ وَالسَّلاَمُ عَلٰی سَیِّدِ الاَنْبِیَاءِ وَالْمُرْسَلِیْنَ ۔ وَعَلٰی آلِہٖ وَاَصْحَابِہٖ اَجْمَعِیْنَ ۔ اَمَّا بَعْدُ،
فَاَعُوْذُ بِالّٰلِہ مِنَ الشَّیْطَانِ الرَّجِیْمِ ۔ بِسْمِ اللّٰهِ الرَّحْمٰنِ الرَّحِیْمِ۔
یٰاَیُّهَا الَّذِیْنَ اٰمَنُوا اتَّقُوا اللّٰهَ وَ كُوْنُوْا مَعَ الصّٰدِقِیْنَ ۔ ( سورہ توبہ، آیت 119)

اے ایمان والو اللہ سے ڈرو اور سچوں کے ساتھ ہو- (کنز الایمان)
اولیائے کرام کا بڑا اونچا مقام ہے، ان کی بر کتیں بیشمار ہیں
حجۃ الاسلام امام غزالی رحمۃ اللہ علیہ اپنے رسالہ "المنقذ من الضلال” میں یہ حدیث نقل فرماتے ہی

بِھَمْ یُمْطَرُوْن، وَ بِھِمْ یُرْزَقُوْن۔

انھیں اولیاء اللہ کے طفیل بارش ہوتی ہے اور انھیں کے طفیل رزق دیا جاتاہے۔ گویا بارش و رزق اولیاءکرام کی برکات کا ایک ثمرہ ہے-
یاد رہے کہ حق کے متوالوں کا ایک گروہ ہر زمانہ میں موجود رہا ہے، بلکہ زمانہ کبھی ان کے وجود سے خالی ہی نہیں رہا، انھیں کی برکتوں سے رحمتوں کا نزول ہوتا ہے۔ انھیں اولیائے کرام میں سے اصحاب کہف بھی ہیں ۔
تمام سلاسلِ اولیاء، برحق ہیں، سلسلہ عالیہ قادریہ، برکاتیہ، رضویہ، نقشبندیہ، مجددیہ، چشتیہ، نظامیہ، سہروردیہ، شاذلیہ وغیرہ ان سلاسلِ اولیاء کی برکات سے پوری دنیا فیضیاب ہے- ان کے درمیان جو اوراد و اشغال میں اختلاف ہے، وہ فروعی ہے، سب کا اصل سرچشمہ، ایک ہی ہے ۔ تمام سلاسل ِحَقَّہ، ذاتِ نبی اکرم صلی اللہ تعالیٰ علیہ و اٰلہ و سلم سے ملتے ہیں-
حضرت سیدنا شیخ عبدالقادر جیلانی رحمۃ اللہ علیہ، حضرت سیدنا داتا گنج بخش علی ہجویری لاہوری رحمۃ اللہ علیہ، حضرت سیدنا خواجہ معین الدین چشتی اجمیری رحمۃ اللہ علیہ، حضرت سیدنا مخدوم اشرف جہاں گیر سمنانی رحمۃ اللہ علیہ، امام اہل سنت، مجدِّد ِدین و ملت، سیدی اعلی حضرت ،امام احمد رضا قادری برکاتی رحمۃ اللہ علیہ، وغیرہم، اولیا ء اللہ کے فیضان و برکات سے ایک عالم، روشن و منور ہے، آج دینا میں اہلِ سنت کے عقیدے میں جوپختگی اور تصلب فی الدین پایا جاتا ہے، وہ انھیں اولیائے کرام اور امام اہل سنت کے فیضان و برکات کا ایک حصہ ہے-
مدارسِ اہل سنت کی برکتیں بھی، اولیاء اللہ کے طفیل ہیں، ان کے بانیان وکارکنان زیادہ تر،صاحب ِ سلسلہ ہیں، جن کے فیضان سے، عالم اسلام مالامال ہے، ان مدارس کی برکات ایشیا، افریقہ، امریکہ، یورپ اور آسٹریلیا وغیرہ ہر چہار طرف پھیلی ہوئی ہیں-
اس وقت اہلِ سنت و جماعت کے حریف، بدمذہب ہیں- ان کے مقابلہ میں، تمام سلاسلِ اولیا کے پیرو کار و متبعین کو آپسی فروعی اختلافات، نظرانداز کرکے ، بدمذہبیت کے بڑھتے ہوئے سیلاب کومتحد ومتفق ہوکر روکنا چاہئے-
اولیاءِ کرام کی تعلیمات کی برکات کوعام کرنا، ان کے افکارونظریات، اذکار و اشغال کو پھیلانا ، تمام سلاسل کے مریدین و متوسلین اور جملہ اہل سنت کا اہم فریضہ ہے-
اس دورِ پرفتن میں جمیع اہل سنت کو، اولیا ء اللہ کا دامن مضبوطی سے تھام لینا چاہئے اور ان کی تعلیمات و برکات کا جو حصہ ملا ہے، اُس کی نشر و اشاعت، مل جل کر خوب خوب کرنا چاہئے-

وَاللہُ الْمُوَفِّقُ وَالْمُعِیْن، نِعْمَ الْمَوْلٰی وَ نِعْمَ النَّصِیْر۔

احمد القادری مصباحی
اسلامک اکیڈمی آف امریکہ

اَلْاِسْلامی.نیٹ
AL islami.net (AL-ISLAMI)
مسائل رمضان، احمد القادری

مسائلِ رمضان

یٰاَیُّهَا الَّذِیْنَ اٰمَنُوْا كُتِبَ عَلَیْكُمُ الصِّیَامُ ،كَمَا كُتِبَ عَلَى الَّذِیْنَ مِنْ قَبْلِكُمْ لَعَلَّكُمْ تَتَّقُوْنَ ۔
(قرآن کریم، سورہ بقرۃ، آیت 183)

اے ایمان والو! تم پر روزے فرض کئے گئے، جیسے اگلوں پر فرض ہوئے تھے۔ کہ کہیں تمھیں پرہیزگاری ملے (کنزالایمان)

رمضان کی فضیلت

شَهْرُ رَمَضَانَ الَّذِیْ اُنْزِلَ فِیْهِ الْقُرْاٰنُ ،هُدًى لِّلنَّاسِ وَ بَیِّنٰتٍ مِّنَ الْهُدٰى وَ الْفُرْقَانِ-فَمَنْ شَهِدَ مِنْكُمُ الشَّهْرَ فَلْیَصُمْهُ-وَ مَنْ كَانَ مَرِیْضًا اَوْ عَلٰى سَفَرٍ فَعِدَّةٌ مِّنْ اَیَّامٍ اُخَرَ۔
(قرآن کریم، سورہ بقرہ، آیت 185)

ماہِ رمضان جس میں قرآن اُتارا گیا- لوگوں کی ہدایت اور حق و باطل میں جدائی بیان کرنے کے لئے، تو تم میں جو کوئی یہ مہینہ پائے تو اسکا روزہ رکھے، اور جو بیمار یا سفر میں ہو، وہ دوسرے دنوں میں گنتی پوری کرے۔ (کنزالایمان)

رسول اللہ ﷺ نے ارشاد فرمایا، جو اس میں نیکی کا کوئی کام کرے، تو ایسا ہے جیسے اور کسی مہینے میں فرض ادا کیا- اور اس میں جس نے فرض ادا کیا ،تو ایسا ہے جیسے اور دنوں میں ستر فرض ادا کئے۔۔۔یہ وہ مہینہ ہے کہ اس کا اول رحمت ہے ،اور اوسط مغفرت ہے، اور اس کا آخر جہنم سے آزادی ہے-
(بیہقی شریف)

روزہ کی فضیلت رسول اللہ ﷺ فرماتے ہیں، آدمی کے ہر نیک کام کا بدلہ، دس سے سات سو گنا تک دیا جاتا ہے- اللہ تعالیٰ نے فرمایا، مگر روزہ ،کہ وہ میرے لئے ہے، اور اس کی جزا میں دوں گا، بندہ اپنی خواہش اور کھانے کو، میری وجہ سے ترک کرتا ہے- روزہ دار کے لئے، دو خوشیاں ہیں، ایک افطار کے وقت اور ایک اپنے رب سے ملنے کے وقت- (بخاری و مسلم)

رسول اللہ ﷺ نے فرمایا: اگر کسی نے ایک دن نفل روزہ رکھا اور زمین بھر اسے سونا دیا جائے، جب بھی اس کا ثواب پورا نہ ہوگا- اس کا ثواب تو قیامت ہی کے دن ملےگا- (طبرانی)

سحری سحری ضرور کھائے، کیوں کہ احادیث میں اس کی بڑی فضیلت آئی ہے، سرکار دوجہاں ﷺ نے فرمایا- سحری کل کی کل برکت ہے، اسے نہ چھوڑنا اگر چہ ایک گھونٹ پانی ہی پی لے- کیوں کہ سحری کھانے والوں پر اللہ اور اس کے فرشتے درود بھیجتے ہیں (مسند امام احمد)

لیکن اس کا یہ مطلب نہیں کہ اگر کسی وجہ سے سحری کے وقت آنکھ نہ کھلی ، تو اس بہانے سے روزہ چھوڑدے کہ سحری نہیں کھا ئی- یا وقتِ سحر ختم ہونے پر بیدار ہوئے ،جب بھی کھالیا کہ بڑی فضیلت ہے، اس صورت میں تو روزہ ہی نہ ہوگا- بلکہ کچھ نہ کھاِئے اور روزہ کی نیت کرے- کیوں کہ روزہ فرض عین ہے، سحری فرض نہیں-

روزہ کی نیت:

نَوَیتُ اَنْ اَصُوْمَ غَدًا لِلّٰهِ تَعَالیٰ مِنْ فَرَضِ رَمَضَانَ ھٰذَا۔

میں نے نیت کی، کہ اللہ تعالیٰ کے لئے اس رمضان کافرض روزہ، کل رکھوں گا-
روزہ کے لئے نیت کرنا ضروری ہے اگر چہ اپنی زبان یا دل میں، سحری کھانا بھی نیت ہے- اگر رات میں نیت نہیں کی، تو دن میں یوں نیت کرے۔

نَوَیتُ اَن اَصُوْمَ الیَوْمَ لِلّٰهِ تَعَالیٰ مِنْ فَرَضِ رَمَضَانَ ھٰذَا۔

میں نے نیت کی، کہ اللہ تعالیٰ کے لئے آج، رمضان کافرض روزہ رکھوں گا- (بہار شریعت)
دن میں نیت کرنے کا وقت: چاشت (ضحوہ کبری) تک نیت کرسکتا ہے اس کے بعد نہیں۔
افطار حضور اقدس ﷺ فرماتے ہیں، جب تم میں کوئی روزہ افطار کرے تو کھجور یا چھوہارے سے افطار کرے کہ وہ برکت ہے- اور اگر نہ ملے ،تو پانی سے کہ وہ پاک کرنے والا ہے-
(ابو داؤد، ترمذی، ابن ماجہ)

رسول اللہ ﷺ نے ارشاد فرمایا، جس نے حلال کھانے یا پانی سے روزہ افطار کرایا ، فرشتے ماہ رمضان کے اوقات میں اس کے کے لٔےاستغفار کرتے ہیں- اور جبرئیل (علیہ الصلوۃوالسلام) شب قدر میں اس کے لٔے استغفار کرتے ہیں (طبرانی کبیر)

افطار کی دعا: حضورنبی اکرم ﷺ افطار کے وقت یہ دعا پڑھتے-

اَللّٰهُمَّ لَکَ صُمْتُ وَ عَلٰی رِزقِکَ اَفطَرْتُ (ابو داؤد، – بہار شریعت، ج ۵ ص ۱۳۱)

اے اللہ! تیرے ہی لئے میں نے روزہ کھا، اور تیرے ہی دۓہوۓرزق پر، میں نے افطار کیا-

مسائلِ ہلال
رویت ہلال: ۔ تمام اسلامی مہینے چاند دیکھنے سے شروع اورچاند دیکھنے پر ختم ہوتے ہیں، اسی طرح رمضان اور عید کا مدار بھی رویت ہلال پر ہے-
نبی اکرمﷺ فرماتےہیں: چاند دیکھ کر روزہ رکھنا شروع کرو اور چاند دیکھ کر افطار (عید)کرو – اور اگر ابر ہو تو شعبان کی گنتی، تیس پوری کرلو- (بخاری و مسلم)

چاند دیکھنے کے بعد کی دعا:

اَللہُ اَکْبَر، اللَّهُمَّ أَهِلَّهُ عَلَيْنَا بِالْيُمْنِ وَالْإِيمَانِ، وَالسَّلَامَةِ وَالْإِسْلَامِ، وَالتَّوْفِيقِ لِمَا تُحِبُّ وَتَرْضَى، رَبِّیْ وَرَبُّکَ اللہُ (یَاھِلَالْ)،(ترمذی، حصن حصین)

اللہ سب سے بڑا ہے- اے اللہ ہم کو، برکت، ایمان، سلامتی اور اسلام کے ساتھ ، چاند دکھا- اور اس چیز کی توفیق کے ساتھ، جسے تو پسند کرتا ہے،اور راضی ہے- (اے چاند!) میرا ،اور تیرا رب اللہ ہے-

مسائلِ زکوۃ
زکوٰۃ ہر مسلمان، عاقل، بالغ، صاحبِ نصاب پر فرض ہے، سال پورا ہوجانے کے بعد، اپنے کل مال کا چالیسواں حصہ یعنی ڈھائی فیصد زکوۃ نکالنا ضروری ہے- چونکہ صاحب ِنصاب کے لئے، سال پورا ہونے سے پہلے زکوۃ نکالنا جائز ہے، اس لئے مسلمان کثرت سے، رمضان ہی میں زکوۃ نکال دیتے ہیں، سال پورا ہونے کا انتظار نہیں کرتے، کیونکہ رمضان میں ثواب، ستر گنابڑھ جاتا ہے-

مقدارِ نصاب
صاحبِ نصاب، وہ شخص ہے جس کے پاس دوسو درہم یعنی ساڑھے باون تولےچاندی، یا بیس مثقال یعنی ساڑھےسات تولے سونا ہو، یا انٹر نیشنل پیمانہ سے، تقریباً 612.41گرام چاندی یا تقریباً 87.48 گرام ، سونا ہو۔
امریکن پیمانہ سے، تقریباً 19.755 اونس چاندی ،یا تقریباً 2.822 اونس سونا ہو۔
یا ان میں سے کسی ایک، اَدنیٰ کی قیمت کا مالک ہو- آج کل ادنی، چاندی ہے، (بوقت تحریر) ساڑھے باون تولے چاندی کی قیمت، تقریبا 300 یو ایس ڈالر بنتے ہیں، یعنی اتنی رقم، کسی کے پاس ہو تو وہ صاحبِ نصاب ہے۔ سونے چاندی کی قیمت، گھٹتی ، بڑھتی رہتی ہے، اس لئے بوقت ضرورت اس کا موجودہ ریٹ معلوم کر لیا جائے۔

مسائلِ عُشُر

وَ اٰتُوْا حَقَّهٗ یَوْمَ حَصَادِهٖ (قرآن کریم ، سورہ انعام 141)

کھیتی کٹنے کے دن اس کا حق ادا کرو۔

حضور اکرم صلی اللہ تعالی علیہ وسلم نے فرمایا، کہ ہراس چیز میں جسے زمین نےنکالا،عشر یا نصف عشر ہے، (کنزالعمال)

جو چیز کھیت میں پیدا ہو (جیسے گیہوں، دھان، سبزی، پھل وغیرہ) اگر سینچائی سے پیدا ہو، تو کل پیداوار کا بیسواں حصہ، ورنہ دسواں حصہ زکوۃ نکالنا واجب ہے- اس میں سال پورا ہونے کی شرط نہیں- اگر سال میں کئی بار پیدا ہو، تو ہر مرتبہ عشر نکالنا ہوگا-

فطرہ
حضور اکرم صلی اللہ تعالی علیہ وسلم نے فرمایا،بندہ کا روزہ آسمان وزمین کے درمیان معلق رہتاہے، جب تک صدقۂ فطر نہ ادا کرے۔ (بہار شریعت، بحوالہ دیلمی، خطیب، ابن عساکر)
نماز عید سے پہلے پہلے ،ہر صاحبِ نصاب پر، اپنی اور اپنی نابالغ اولاد کی طرف سے، آدھا صاع گیہوں، یا اس کا آٹا، اس کی قیمت ، یا ایک صاع جو، یا کھجور ، یا مُنَقّیٰ ،یااِن میںسے، کسی ایک کی قیمت کا صدقہ کرنا واجب ہے- قیمت دینا افضل ہے

صاع کی مقدار
انٹر نیشنل پیمانہ سے صاع کی مقدار تقریباً 4 کلو 94 گرام ،اور آدھا صاع کی مقدار، تقریباً 2 کلو 47 گرام ہے
امریکن پیمانہ سے صاع کی مقدار، تقریباً 9.016 پو نڈ ، اور آدھا صاع کی مقدار تقریباً 4.508 پونڈ ہے۔
بندہ کا روزہ، آسمان و زمین کے درمیان ،معلق رہتا ہے، جب تک صدقۂ فطر ادا نہ کرے (حدیث)

مصارفِ زکوۃ
اپنی اصل (ماں، باپ، دادا، دادی، نانی وغیرہ) اپنی اولاد (بیٹا، بیٹی، پوتا، پوتی،نوسہ، نواسی وغیرہ) اپنی بیوی یا شوہر اور بنی ہاشم کو زکوۃ نہیں دے سکتے- ان کے علاوہ تمام مسلم غربا و مساکین کو زکوۃ دے سکتے ہیں- ہاں اگر وہ غریب مسلمان، طالبِ علمِ دین ہے، تو دوسروں کی بہ نسبت اس کی امداد کرنا زیادہ فضیلت کا باعث ہے ،کیونکہ اس میں ایک غریب مسلمان کی مدد بھی ہے اور علم دین کی اشاعت بھی-
اسی لئے مسلمان زیادہ تر زکوۃ مدارس اسلامیہ کو بھیج دیتے ہیں- ہاں مدارس میں زکوۃ بھیجتے وقت، پہلےسے مدرسہ کے مہتمم کو اطلاع دیدیں ،کہ یہ مالِ زکوۃ ہے، تاکہ وہ اسے الگ رکھیں، اور مصارفِ زکوۃ میں خرچ کریں-

ترکیب نماز عید یہ دوسری نمازوں ہی کی طرح پڑھی جاتی ہے- بس فرق اتنا ہے ،کہ اس میں واجب عیدالفطر کی نیت ہوگی، پہلی رکعت میں ثنا کے بعد تین زائد تکبیریں اور دوسری میں رکوع سے پہلے تین
زائد تکبیریں کہی جائیں گی- اِس میں اقامت نہیں، نماز کے بعد خطبہ ہوگا، اس کے بعد دعا، پھر مصافحہ و معانقہ وغیرہ اظہار مسرت کے لئے جائز مستحسن ہے-
(ماخوذ از بہارشریعت وغیرہ ملخصاً)

احمدالقادری مصباحی
اسلامک اکیڈمی آف امریکہ

اَلْاِسْلامی.نیٹ
AL islami.net (AL-ISLAMI)
ماہِ شعبان کی پندرہویں رات
ماہِ شعبان کی پندرہویں رات کو شبِ برأت کہا جاتا ہے شب کے معنی ہیں رات اور برأت کے معنی بری ہونے اور قطع تعلق کرنے کے ہیں ۔ چونکہ اس رات مسلمان توبہ کرکے گناہوں سے قطع تعلق کرتے ہیں اور اللہ تعالیٰ کی رحمت سے بے شمار مسلمان جہنم سے نجات پاتے ہیں اس لیے اس رات کو شبِ برأت کہتے ہیں ۔ اس رات کو لیلۃ المبارکۃ یعنی برکتوں والی رات، لیلۃ الصک یعنی تقسیم امور کی رات اور لیلۃ الرحمۃ یعنی رحمت نازل ہونے کی رات بھی کہا جاتا ہے۔
فضائل شب معراج شریف
یہقی شعب الایمان اور دیلمی نے مسند الفردوس میں سلمان فارسی رضی اﷲ تعالیٰ عنہ سے مرفوعاً روایت كی
فی رجب یوم ولیلة من صام ذٰلك الیوم وقام تلك اللیلة كان كمن صام من الدهر مائة سنة وقام مائة سنة وھو  لثلث بقین من رجب وفیه بعث اﷲ تعالٰی محمدا صلی اﷲ تعالٰی علیه وسلّم
رجب میں ایک دن اور رات ہے جو اس دن كا روزہ ركھے اور وُہ رات نوافل میں گزارے سَو برس كے روزوں اور سَو برس كے شب بیداری كے برابر ہو، اور وہ ۲۷رجب ہے اسی تاریخ اﷲ عزوجل نے محمد صلی اﷲ تعالیٰ علیہ وسلم كو مبعوث فرمایا۔
الفردوس بمأثور الخطاب حدیث ٤۳۸۱ دارالكتب العلمیہ بیروت ۳ /۱٤۲
شعب الایمان حدیث ۳۸۱۱ دارالكتب العلمیہ بیروت ۳ /۳۷٤
نیز اسی میں بطریق ابان بن عیاش حضرت انس رضی اﷲ تعالیٰ عنہ سے مرفوعاً مروی
فی رجب لیلة یكتب للعامل فیھا حسنات مائة سنة، وذٰلك لثلٰث بقین من رجب فمن صلی فیه اثنتی عشرة ركعة یقرأ فی كل ركعة فاتحة الكتاب وسورة من القرأن، ویتشھد فی كل ركعة ویسلم فی اٰخرهن، ثم یقول، سبحٰن اﷲ والحمدﷲ ولاالٰہ الااﷲ واﷲ اكبر مائة مرة ویستغفر اﷲ مائة مرة ویصلی عن النّبی صلی اﷲتعالٰی علیہ وسلم مائة مرة ویدعو لنفسہ ماشاء من امر دنیاه واٰخرته ویصبح صائما فان اﷲ یستجیب دعاء كلہ الاان یدعوفي معصیة۔
رجب میں ایک رات ہے كہ اس میں عمل نیك كرنے والے كو سَو برس كی نیكیوں كا ثواب ہے اور وہ رجب كی ستائیسویں شب ہے جو اس میں بارہ ركعت پڑھے ہرركعت میں سورہ فاتحہ اور ایك سورت، اور ہر دوركعت پر التحیات اور آخر میں بعد سلام سبحن اﷲ والحمد ﷲ ولاالٰہ الا اﷲ واﷲ اكبرسو بار، استغفار سَو بار، درود سو بار، اور اپنی دنیا وآخرت سے جس چیز كی چاہے دعا مانگے اور صبح كو رزہ ركھے تو اﷲ تعالیٰ اس كی سب دعائیں قبول فرمائے سوائے اس دُعا كے جو گناہ كے لیے ہو۔ (شعب الایمان حدیث ۳۸۱۲۱ دارالكتب العلمیہ بیروت ۳ /۳۷٤)
فوائد ہناد میں انس رضی اﷲ تعالٰی عنہ سے مروی
بعث نبیا فی السابع والعشرین رجب فمن صام ذٰلك الیوم ودعا عند افطارہ كان لہ كفارة عشر سنتین۔
۲۷ رجب كو مجھے نبوت عطا ہُوئی جو اس دن كا روزہ ركھے اور افطار كے وقت دُعا كرے دس برس كے گناہوں كا كفارہ ہو۔ (تنزیه الشریعة بحوالہ فوائد ہناد كتاب الصوم حدیث ٤۱ دارالكتب العلمیة بیروت ۳ /۱٦۱)
جزء ابی معاذ مروزی میں بطریق شہر ابن حوشب ابوھریرہ رضی اﷲ تعالیٰ عنہ سے موقوفاً مروی
من صام یوم سبع وعشرین من رجب كتب اﷲ له صیام ستین شھرا وھو الیوم الذی هبط فیه جبریل علی محمد صلی اﷲ تعالٰی علیه وسلم بالرسالة۔
جو رجب كی ستائیسویں كا روزہ ركھے تو اﷲ تعالیٰ اس كے لیے ساٹھ مہینوں كے روزوں كا ثواب لكھے، اور وُہ وُہ دن ہے جس میں جبریل علیہ الصلٰوة والسلام محمد صلّی اﷲ تعالیٰ علیہ و سلم كے لیے پیغمبری لے كر نازل ہُوئے۔ (تنزیه الشریعة بحوالہ جزء ابی معاذ كتاب الصوم حدیث ٤۱ دارا لكتب العلمیه بیروت ۳ /۱٦۱)
تنزیه الشریعة سے ماثبت من السّنة میں ہے
وھذا أمثل ما ورد فی ھذا المعنی۔
یہ اُن سب حدیثوں سے بہتر ہے جو اس باب میں آئیں۔ بالجملہ اس كے لیے اصل ہے اور فضائلِ اعمال میں حدیثِ ضعیف باجماعِ ائمہ مقبول ہے واﷲتعالٰی اعلم۔
تنزیه الشریعة بحوالہ جزء ابی معاذ كتاب الصوم حدیث ٤۱ دارا لكتب العلمیہ بیروت ۳ /۱٦۱
ما ثبت بالسنة مع اردو ترجمہ ذكرماہِ رجب ارادہ نعیمیہ رضویہ لال كھوہ موچی گیٹ لاہور ص ۲۳٤
تحقیق: اعلیٰ حضرت الشاہ امام احمد رضا خان علیہ الرحمۃ والرضوان
کتاب: العطایا النبویہ فی الفتاوی الرضویہ ، جلد ۱۰ ، صفحہ
مینو